Laudio

Nerbioi ibaiak zeharkatua, Laudio herriak Industria Iraultzari lotutako garapen indartsua izan zuen. Ez alferrik da, gaur egun ere, Arabako bigarren udalerri jendetsuena. Nerbioi Garaiko lehen fabrika modernoak iringileak izan ziren; XIX. mendearen erdialdean, burdinolen eta erroten azpiegiturak baliatu zituzten beren makineria konplexua instalatzeko. Pixka bat geroago, trenbidea iritsi izanak inguruan enpresa gehiago asentatzea eragin zuen, eta ekoizpen-ehun oparoa sendotu zen haiekin. Gaur egun inguru honi «beiraren harana» deritzo, eta udalerria sektoreko hiriburu bihurtu duten enpresak daude han.