Zubiate Labea

Buztinaren lanketa

Urbanizazio berri batean integratua, labe hau XIX. mendearen erdialdean eraiki zen eta XX. mendearen hasiera arte aritu zen lanean. Gipuzkoan kontserbatu den buztingintzako labe bakarra da, jarduera hau oso presente egon zen arren beste herri batzuetan ere, hala nola Aretxabaleta, Azkoitia, Oñati, Tolosa, Zegama… Haren azterketa arkeologikoa eta birgaitze-lana egin eta gero, gaur egun Ibarraundi museoa da, buztingintzako lanari buruzkoa.

Labearen osagarriak dira parrila bat, errekuntza ganbera bat (zeinean oraindik ere beiraketaren hondakinak ikusten diren, kolore zurikoak) eta egosketa ganbera bat, kargako eta deskargako bi punturekin.

Eraikuntza hau makina bat da berez. Goranzko aireztapeneko edo tiro bertikaleko labe bat da, arabiarra deritzona, eta zeramika egosteko eraiki zen.

Prisma lauangeluar bat da, zabala baino garaiagoa (5 metroko altuera x 4 m2-ko oinplanoa), eta 0,99 metroko lodierako harrizko hormak ditu.

Labearen egoste-ganbera material erregogorrez estalita dago, eta gainjarritako bi ate edo albateren bidez zabaltzen da, labea kargatzeko.

Barruan egurrezko egitura bat zegoen, egosi behar ziren ontziak jartzeko. Nolabaiteko aldamio hori matoi eta matoi txiki izeneko euskarriz eta treberaz edo txakurrez bereizitako adreiluz osatuta zegoen. Labea kargatu ondoren, estalki moduko zenbait txintxorrez estaltzen zen.